memoria viva

Como era a vida da xente antiga? Que nos contan as nosas avoas? Que lembran as nosas avoas que lles contaban as súas?

Cales son as lembranzas dos cativos e cativas?  Que cousas lles impactaron no seu pequeno periodo de vida? Cales serán os seus recordos e historias?

Como foi cambiando a vida en Miño? Que impacto tiveron eses cambios sobre o territorio e as persoas que o habitan?

memoria

Historias de Miño é un arquivo da memoria local.

Son historias que chegan ata a actualidade contadas pola veciñanza, basadas nas súas anécdotas, situacións e recordos. Moitas desas historias son comúns, vivencias que comparten moitas persoas.

A memoria é algo vivo e dinámico, unha materia difícil de sintetizar. Nunca che contan a mesma historia do mesmo xeito. Como di o refrán portugués “quem conta um conto acrescenta um ponto”.

Cando recordamos estamos transformando, estamos traendo ao presente algo que aconteceu. Recordar é revivir un pasado.

Acceder a estes diversos pasados permítenos ter unha ollada temporal sobre o territorio, e ter unha visión comparativa co presente. Coñecendo estas intrahistorias podemos enriquecer a nosa visión crítica, mais tamén podemos aprender a valorizar, amar e respeitar o patrimonio material e inmaterial do noso territorio.

O arquivo Historias de Miño é un retrato social. Nace cunha serie de relatos construídos entorno ao non catalogado, entorno ao patrimonio inmaterial que imprime vida ao patrimonio material. Son as intrahistorias que van conformando este concello. A vida que serve de fondo permanente á historia cambiante e visible.

O arquivo sitúa e contextualiza nun MAPA o patrimonio histórico, dende o experiencial e o emocional, dende as diversas subxectividades, cara a unha subxectividade común.

Podemos atopar relatos sobre o patrimonio natural, os hábitos, os oficios e técnicas, ás lendas, e os cambios sociais e tecnolóxicos, entre outros temas.

Este arquivo nace coa vontade de ir ampliándose de cara ao futuro, construíndo a memoria común do concello dun xeito participativo.

Historias de Miño é un arquivo oficial da memoria local de Miño producido pola asociación RuralC para o Concello de Miño.

Os relatos foron escritos por Vanesa Castro e Iñaki López a partires das historias recollidas entre a veciñanza de Miño entre os meses de setembro e novembro de 2017.

As imaxes antigas foron cedidas polo Concello de Miño para a súa publicación neste arquivo.

Textos baixo licencia CC BY-NC 3.0

Ilustracións por Iñaki López.

 

LOGO CONCELLO                      cabecera+web+ruralc

 

Na prensa:

 

 

Advertisements